أشعار بالعاميه المصريه

اشعار بالعاميه المصريه بكافه انواعها




ميدان الجيزة

ضيعت شوية سنين كده
بحب من بعيد لبعيد
والحكاية مقضيانى
ومبسوط وراضى وسعيد
أفرح بأى حاجة
وأستنى هدوم العيد
وبعدين ضيعت شوية سنين
نفسى أبقى أشطر واحد فى الكيميا
مع أنى مش فاهم ميدان الجيزة
والحياة رغم قسوتها
شايفها لذيذة
وضيعت شوية سنين بقى
نفسى أعدى أختبارات الكورة
فى النادى الأهلى
وأشتغل فى وكالة ناسا
وأبقى واحد من العلماء المهمين
وبعدين ضيعت شوية سنين
منتهى املى كرسى فاضى
فى أتوبيس تلات خمسات
عين الصيرة أم المصريين
وضيعت شوية سنين
عايز أفهم الفرق
بين النكسة والهزيمة
والأحترام وقلة القيمة
وأبقى نجم سيما
م المشهورين
وبعين ضيعت شوية سنين
واقف عند نظرية المؤامرة
لا عارف أعيش ف الزمالك
ولاراضى أعيش فى غمرة
ومش عارف ليه الحشيش ممنوع
مدام مصرحين بالخمرة
وياترى بقى أتجوز
واحدة بيضة ولا سمرة
ولا أسأل فيها
رجال الفتوى والدين
وضيعت شوية سنين
مركز فى السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
وقشرة الموزة
وضيعت شوية سنين
لا أنا بحر ولا نيل
حاجة كده بعيد عنك
ملهاش عوزة
ولما بقيت كام وخمسين
لقيتنى لسة
بحب من بعيد لبعيد
وبرضة مش فاهم
ميدان الجيزة

شعر علي سلامة

ناقص حتة

وكل ما أوزن ....
ألاقي لسه ....
ناقص لي حته ...
أحط حته .....
تقل حته .....
وأجيب قميص ..
تضيع چاكته ...
وأعيش لي ساعة ..
يفوتني سته .....
وكل ما أوزن ...
ألاقي ناقص ...
أقول بناقص ..
لو هي حته ..
أتاري لسه ...
ولسه تاخد ..
سنين وحته ...
وحاجات تسيبني ..
وحاجات تاخدني ...
لحاجات تخبط ...
في كل حته ....
وأقول ها نفرح ..
في يوم ...
ها نفرح ....
ويوم ما نفرح ..
على الله ...
يفضل في القلب حته ….. ....



علي سلامة
غناء: وجيه عزيز

بعدين

بعدين
أنا راجع مدغدغ
عندى صداع
مش عارف ليه
وزغللة ف العين
بعدين
والشارع بين شارى وبياع
واقف يتفرج ع الصفين
إشارات إشارات
وحاجات زى الخيالات
مش عارف جايه منين
على فين
بعدين
بعدين يا حبيبتى هانتمشى
على شط النيل
وندردش واحنا بنتعشى
ونقول مواويل
خلينا دلوقتى زميلة وزميل
بس دقيقتين
أعرف أنا مين
ودماغى معايا
واللا نسيتها مع المفاتيح
ف دكان على ناصية
بين شارعين
بعدين
بعدين هانشوف اللى ماشفنا
ونعيش يا حبيبتي
اللى ماعشناش
وندور ع اللى راح ولا جاش
لو كان ف العمر باقى لبعدين
بعدين

شعر علي سلامة

كلام الزراير

رسايل من بعيد
فيها الهزار والجد
لكن لا حد راح للعيد
ولا العيد راح لحد
وداير ما بينا كلام الزراير
نقط.. حروف
صور.. دواير
وتتغرب قلوبنا
ونحلم تعود بأقل الخساير
تن تن.. تن تن
كل سنة وإنت طيب
تن تن.. تن تن
أشوفك قريب
تن تن.. تن تن
البلد بتتحرق
تن تن.. تن تن
الصحافة بتتخنق
تن تن.. تن تن
ممنوع التصوير
تن تن.. تن تن
أمك ماتت
تن تن.. تن تن
مبروك
الواد جاب مجموع كبير
تن تن..تن تن
مفيش عيش
تن تن.. تن تن
مظاهرة ف ميدان التحرير
تن تن.. تن تن
وحشتيني اوي
تن تن.. تن تن
وانت راجع هات معاك
ربع جبنه بيضه
وعلبة عصير
تن تن.. تن تن
أنا مسافر
تن تن.. تن تن
ف ستين داهية
تن تن.. تن تن
إنتي طالق..
تن تن.. تن تن
مش هاتفرق كتير..

شعر علي سلامة

بلاد تركب الفيل

في بلاد تركب الفيل
فيه اختراع جميل
إنك لو حسيت بالملل
أو بالفشل
أو إنك بايخ
زي الضيف التقيل
تقدر تسلم العهدة والمفتاح
وتريح وترتاح
ومع السلامة تستقيل
واستمتع بقي بالحياة
بعيد عن مصالح خلق الله
مع أطيب التمنيات
بالعمر الطويل
وعندك يا عم مليون بديل
..يعني مثلا
تتمشي ع الكورنيش
تتسلي ف طابور العيش
تتفرج علي أفلام قديمة ولذيذة
تزور حديقة حيوانات الجيزة
تشجع الزمالك
تشيل حديد
تلعب رياضة
تلعب بعيد
تهاجر عند خالتك ف كندا
تتفرج علي منظر الغروب
تصاحب أحمد المزين
تشرب خروب
تعمل ع الفيس بوك جروب
تتوب وتندم ع اللي فات
أو تنحرف وتعاكس البنات
لكن للأسف
في بلاد الهرم والنيل
مفيش استقالة
ولا حساب
ولا إحالة ولا تبديل
والكل عايش ف الوطن
يا صاحب ملك
يا إيجار قانون جديد
يا عابر سبيل

علي سلامة

خايف اصحى ما الاقيش مصر

ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر

خايف يوم أصحي..
وأفتح الشباك..
مالاقيش مصر


ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت..
تعبت..
إتخنقت
أصلنا زودناها..
أكننا استعمرناها..
ورثناها


مصر البنوتةالحلوة
اللي زي القمر
بقت عجوزة وشايبة
وبان عليها الكبر


خايف يوم أصحي..
وأفتح الشباك..
مالاقيش مصر

شعر علي سلامة

طبق اليوم

ربع كوباية مية م الحنفية..
ده لو تيسر..
نص كيلو بصل..
ومش شرط يتقشر..
وسنة ملح وفلفل أسمر..
ولو مفيش أسمر..
أي لون يعجبك..
يا عم إكتب ورايا..
إحنا من أولها هانكشر..
شعار البرنامج إيه..
الطبيخ نفس..
مش أكتر..
وتشهد علينا الحلل والبوابير..
إننا طبخنا لحم الكلاب..
والحمير..
لا حد مات..
ولا حد قال آي..
ولا حد وقع وإتكسر..
والجدع بقي اللي يعرف ليه..
أو يقدر يفسر..
معادنا الأسبوع الجاي..
مع حلقة جديدة م البرنامج..
لو كان لنا عمر..
وفينا روح..
نضحك..
ونبكي..
ونهزر..

شعر علي سلامة

مصاريف المدرسة

البنت بنتي..
كل يوم تكبر سنين..
حلوين عينيها..
بس ليه..
مش فرحانين..
في السن ده..
وبتقول كلام..
ليه لما تصحي..
بكون بنام..
حاولت أقرب منها..
لاقتني مش عارف أنا..
أبقي مين..
وفتحت قلبي يقولها..
ملقيتش غير..
مصاريف المدرسة..
وفلوس المدرسين..

علي سلامة

مش بتاع كده

لما أنا مش بتاع كده..
ولا بتاع كده ولا كده..
أمال أنا بقي..
أبقي بتاع إيه..
لما أنا مش شيخ..
ولا فلتان..
لما أنا مش فايق..
ولا سكران..
وساعات يتهيألي..
إن أنا فرحان..
أتنطط وأصرخ..
وأقول هيه..
لما أنا مش أفندي..
ولا فلاح..
ولا شجرة جميز..
ولا تفاح..
لا أنا بتألم ولا مرتاح..
لا عندي شيء استناه..
ولا عندي شيء أبكي عليه..
ولما أنا شايف الحال بقي كده..
طب ساكت ليه..
يا عم أنا مش بتاع كده..
فيه إيه!

شعر علي سلامة

كيس بلاستك

من كتر ما الحزن رطرط..
مبقاش خلاص يتحس..
فضلت الأحلام..
تتقص تتقص تتقص..
لحد ما بقت ف النهاية..
رغيف..
وكيس بلاستيك.
وبس..
عارف..
بصحي قلبي..
عشان يحب..
قام بقرف..
واتلفتلي وبص..
ورجع نام تاني..

شعر علي سلامة

ميدان العتبة

لما أنا والسرير بنتخاصم..

لا يمكن أرتاح ع الكنبة..

ولا ع الكرسي ولا ع الأرض..

ولما يومي بيبتدي..

من ميدان العتبة..

بعرف أد إيه يا حبيبتي..

إحنا لسه بعاد عن بعض..

ولما العلاج يبقي كله مسكنات..

بتتساوي كل الأوجاع..

الصداع..

زي المرارة..

وسرطان..

زي نزلة البرد..

المهم..

يوم التلات اللي فات..

كان يوم حافل..

طول النهار بلف..

علي كالون ست تكات..

روحي ضايعة..

وقلبي قافل..

قالتلي بحبك..

قلتلها مش سامع..

قالتلي وحشتني..

قلتلها مش شايف..

قالتلي إنت سافل..

سكت ومشيت..

زي ما بتمشي كل المسائل..

تسرقني من تاني..

نفس الحاجات..

وكل ما حس بالألم..

أقول لقلبي تستاهل..

آد إيه يا حبيبتي عيونك..

جميلة أوي وصافية..

لكن ميدان العتبة..

ديما يفكرني..

إني لسه..

في العشق جاهل..

شعر علي سلامة

احسن م القعدة ع القهوة

فكر يا عبدالجبار..
فكر يا عبدالجبار..
إزاي تبقي واد مشهور
وعليك النور
وف نشرة الأخبار..
أحسن م القعدة ع القهوة
أشتغل ف الفتوي
والطيبين ملايين
والعطشانين كتار..
صحيح إنت جاهل
وإحنا نستاهل
ولسانك منشار..
العب ف الأساس
واخطف ودان الناس
ارمي ف عقولهم قطة
وف قلوبهم فار..
وخدهم معاك فسحة
علي بئس المصير في النار..
بص..
تتكلم عن الرضاعة
يفرحوا الحلوين
المراهقين الكبار..
وخش ع السرير
وفوايد الجرجير
والتوابل
واكسب العطار..
وشوية ف الفن
وبدل الرقص
وإحنا تعبانين
ومليانين نقص
وبالليل غير بالنهار
وإوعي تقلق خالص..
إحنا أحسن ناس بننسي..
وبنسامح الشياطين
والمجرمين الكفار..
يعني جت عليك إنت
يا عم عبدالجبار..

شعر علي سلامة

الفاتحة ع الاموات

وفضلت استني استني..

لحد ما عدي آخر قطر وفات..

حزنت قعدت أعيط أعيط..

تعبت م العياط..

قلت أتمشي أتسلي..

أتفرج ع الشوارع والناس

والعربيات..

زهقت..

قلت أرتاح..

سندت علي روحي..

اتلخبطت جوايا كل الحاجات..

مديت إيدي ف جيوبي..

لقيت شوية ورق قديم..

وصور وكروت تليفونات..

قلت أكلم مراتي..

افتكرت إنها خدت الدوا..

ونامت من تلات ساعات..

قلت أكلم أخويا..

افتكرت إنه طلع معاش مبكر..

وكاره تاريخه..

ومركز ف التأمينات..

أكلم أختي..

ها تعيد وتقول نفس الحكايات..

أكلم خالي..

افتكرت إنه غتت غتاتة..

ومعايا أنا بالذات..

أكلم خالتي..

قلت يا واد

دي كات خالتي وخالتك..

واتفرقوا الخالات..

أكلم صاحبي صلاح..

افتكرت إنه سافر العراق..

وفي احتمال يكون مات..

قلت أنا أنسي وأعمل دماغ..

بس ما عرفش حد بتاع مخدرات..

قلت أمشي ف مظاهرة..

لقيت العساكر راجعين..

مشطبين علي كل المظاهرات..

قلت أتصل بالسادة المسؤولين..

هايتهموني بإزعاج السلطات..

قلت يارب..

هو أنا إيه..

وليه..

ونسيت إيه..

وقطر إيه ده اللي فات..

الله يرحمك بقي يابا..

والفاتحة ع كل الأموات..


شعر علي سلامة

رقم

إحنا يا دوب رقم..

والماتش شغال..

من غير حكم..

فاول مافيش..

أوت مافيش

ومافيش ضربة جزاء..

وكل يوم موضة..

وكل دقيقة عرض أزياء..

وكل شيء للبيع..

ومافيش أكتر من الأسواق..

وإيه يعمل الأدب..

وإيه تعمل الأخلاق..

في ماتش..

من غير حكم..


شعر علي سلامة

اللهم اجعله خير

نفسي أتمطع..

أنزل أطلع..

أحلق أقرع..

وأتشجع وأقلع

كل هدومي القديمة..

وأرمي الحاجات اللئيمة..

وأبقي حر كده زي الطير..

نفسي أضحك من قلبي..

من غير ما أخاف..

وأقول اللهم اجعله خير..

يا أخي نفسي مرة..

أغير خط السير..

يعني مش زي ما روحت..

لازم أرجع..

نفسي أفرح بضحكتك..

من غير ما أخطفها منك..

أو أحسدك..

أو أطمع..

نفسي أبص م الشباك براحتي..

وأقول ياه..

الله..

يا بختي..

وأحس من تاني بالجمال..

يا سبحان من أبدع..

ونفسي ده يحصل..

قبل كل شيء جوايا..

ما يعجز..

أو يودع..

م الآخر..

نفسي أرجع تاني..

بني آدم..

تفتكر ده ممكن؟!

وأنا لا بشوف..

ولا بسمع..


شعر علي سلامة

بوابة تفتيش

بوابة تفتيش علي بابك...

كل ما أحاول أعدي تزمر..

وبتتشرط..

وبتتأمر..

أرجع أدور تاني وأدور..

وكل ما عدي برضه تزمر..

طب آدي الساعة..

آدي حزامي..

وآدي بطاقتي..

والنضارة..

وآدي عنواني..

وكل حكايتي..

وآدي أمارة..

حتي الفكة الباقية ف جيبي..

والأشعار..

والمحفظة مفيهاش غير صورتك..

ليل ونهار...

كل هدومي..

زي ما نازل من بطن أمي..

من غير حتي ورقة توت..

وكل مافوت..

البوابة برضك بتزمر..

ولما لمحني..

واحد واقف م الحراس..

قاللي إسمعني ياابن الناس..

إرمي الحتة الحلوة ف قلبك..

وعدي..

والبوابة عمرها..

ما تزمر...


شعر علي سلامة

التفاضل والتكامل

وأزمة تغطي علي أزمة..
وشبشب ينسينا الجزمة..
وكلام عادي..
لكلام فاضي..
لكلام يوجع ملوش لزمة..
ودق الطبل..
بيداري علي الزمار..
وعضة كلب تألمنا..
نقول ياريتنا كملنا..
معاك يا حمار..
ماسورة ميه تلخمنا..
تنسينا إننا عايشين..
ف قلب النار..
ويبقي الحزن شيء عادي..
وحتي الموت كمان عادي..
وهزار ف هزار..
ورغم إننا فاهمين وم الشطار..
لكننا دايما نغلط..
في نفس السؤال..
في نفس الاختبار..

شعر علي سلامة

تراب السفر

أنا بان علي الكبر..
واللا تراب السفر..
واللا ده شكل الخوف..
من غير ونس..
يا قمر..
أنا بان علي الزمن..
واللا ده رخص التمن..
واللا دي غربة روح..
وسط الصحاب يا وطن..

شعر علي سلامة

المصري

المصري ع المصري...
يقدر ويتشطر...
واللي بني مصر...
لا خطط..
ولا سطر..
ولا قال في يوم...
المطرة ها تمطر
اللي...

شعر علي سلامة

الدولاب

جوه الدولاب..

كل الحاجات فوق بعضها

وسنين كتير

تعبت أنا من عدها

فيه حاجات تضيع

مايهمنيش

وحاجات تروح..

ماقدرش أعيش..

يوم بعدها

جوه الدولاب..

قصص كتير

قصاقيص ورق

صور..

وشوك جنب الحرير

ألوان فرايحي

منورة ف العتمة لكن

وهدوم تقيلة

لسه فيها البرد.. ساكن

وحاجات جديدة

اشتريتها من سنين

ماعرفش ليه

بخاف ..أقرب منها

شعر علي سلامة

غلطة الحلاق

سنين ماشيين ع العلاج..

لا حد فينا مات..

ولا حد فينا خف..

زي الهدوم القديمة..

اللي في الدولاب..

فوق خالص ف آخر رف..

تسأل علي ف العيد..

وأزورك وإنت مريض..

بسرعة بسرعة خطف..

واهي أيام..

يادوب نحافظ ع النظام..

الطويل ورا..

والقصير قدام..

ونعدل الصف..

وطابور يسلمنا لطابور..

والعفاريت مش زي زمان..

بتخاف م النور..

لأ.. ده إحنا ممكن ف عز الضهر..

نقع م البلكونة أو نتخطف..

أو نتحدف حدف..

عشان كده بنخاف من بعضنا..

وم الصور وم الأسامي..

نعمل باب حديد للشقة..

وتوكيل للمحامي..

وعقبال ما نقول..

امسك حرامي..

يكون النهر جف..

علي فكرة..

التعويرة اللي ف راسي..

دي غلطة الحلاق..

قلتله خللي عندك ذوق وأخلاق..

راح شالها بالموس وحف..

خلاني أحس بالبرد

ف عز أغسطس..

ألبس طاقية..

وأتكلفت ف ميت بطانية..

وأتلف لف..

شوف.. مش مهم راسي..

لكن اللي جرح إحساسي..

واحد قليل الأدب..

بص ع التعويرة...

وقال إيه القرف ده وتف..

بس أنا جريت وراه..

وقلتله ورحمة أمي

ما ها اسيبك..

وصعب علي نفسي..

فضلت أعيط..

واضرب كف علي كف..

لكن بعد كده نسيت..

وقبل كده نسيت..

أصل أنا قلبي أبيض

ولو مش مصدق..

اقرا حضرتك الملف..


شعر علي سلامة

كرت حرية

بص يا عم..
من حقك تختار..
ملك أو كتابة..
ولو ف نص الليل..
حد جرك من قفاك..
قول له بقلب جامد..
فين إذن النيابة..
وطالما كده كده بتتسرق..
يبقي ع الأقل تعرف..
مين همّ أفراد العصابة..
إنت بس..
إشحن حرية..
كارت من أبو عشرة..
أو عشرين..
أو خمسين أو مية..
تلاقي قلبك بقي زي الحديد..
وقادر تفوت من أي بوابة..
وتغني للصبح..
وتقول ع الربابة..
بس خللي بالك..
لو رصيدك خلص..
أو انتهت الصلاحية..
ها تتغير العيشة..
وهاتعرف إن الدنيا كدابة..
بنت كدابة..
وها تفتكر كل اللي راح..
وتقول الله يرحمك يامه..
ويرحمك بقي يابا..
لا هاتلاقي عيش وملح..
ولا أصحاب..
ولا أهل..
ولا قانون..
ولا نقابة..
ساعتها بس هاتعرف تفرق..
بين العصافير والديابة..
وإن الكلام الحلو..
والغنا الجميل..
كان مجرد سحابة..
وإنك لسه برضه الواد..
إبن الناس الغلابة..
وإن لسه فيه خوف..
ورصاص..
وعسكر..
ودبابة..
علي فكرة مش دايما
الأسد الجدع النبيل..
بيبقي هو ملك الغابة..

شعر علي سلامة

بعد اذن حضرتك

مش دي بطاقتي...

وده رقمي القومي..

ودي الحقيقة وده الخيال..

مش دي الخريطة..

ودي المدينة وده المحور..

وده المترو وكده يمين وكده شمال..

مش ده ظابط وده عسكري..

وده طبيب وده كمساري..

وده قاضي وده بقال..

مش ده جامع ودي مدرسة..

وده بيت دعارة..

وده سمسار وده شيال..

مش ده فستان ودي جلابية..

وده شورت وده مفيش وده شال..

مش ده أتوبيس ودي عجلة..

ودول حمير ودولا جمال..

مش ده عمي ودي أختي..

ودول صحابي وده كمال..

مش ده شارعنا..

وده بيتنا..

ودي مراتي ودول العيال..

مش ده الوطن....

وده المواطن....

وده التاريخ اللي إتقال....

طب ليه...

كل ماروح ف حتة وأسأل سؤال...

يقولولي جايز...

يمكن ....

إحتمال.......!


شعر علي سلامة

اد العسل والسكر

عورتني ف قلبي..
حتة تعويرة..
كبيرة كبيرة..
من كبرها..
كل ما احاول أضحك...
أفك تكشيرة بتكشيرة..
ابني العزيز الغالي
ياصاحبي وجاري
وزميلي في المدرسة
سنة بسنة..
مين اللي قال..
مافيش أغلي من الضنا..
هو أنا إنت..
ولا إنت أنا
طب ما أنا..
بفرح بإذنك..
وبحزن بإذنك..
وبحلم بإذنك..
اخترت اسمك صحيح..
لكن من بعد إذنك..
اسمح لنا نفرح..
يااه...
لما تضمني..
بحبك أد العسل والسكر..
وأد الدنيا دي كلها..
دلوقتي بس عرفت..
أمي وقلبها..
وعرفت أد إيه..
أبويا كان بيحبني.

شعر علي سلامة

الواد ميشو

ابني الصغير
دمه خفيف شربات..
من غير ما يقصد
ياما علمني حاجات..
ماعادش بيحب الحواديت
ولا حكايات الشاطر حسن..
لكن لسه بيموت ف الرز باللبن
ويغرق ف البلوظة..
قلت له نفسك تبقي إيه
لما تكبر يا ميشو..
قاللي يا بابا نفسي أبقي نائب...
قلت له...
دي اتلغت يا حبيب بابا..
قالي خلاص
أبقي أنا الـ....
قلت له ودي محجوزة..
قاللي ممكن يا بابا أبقي..
قلت له ودي للناس المحظوظة..
ودي محتاجة وقت..
وأنا كبرت
وأمك كمان ست عجوزة..
قاللي خنقتني يا بابا
تصدق..
قلت له جننتني يا ميشو
يا ابني نقي حلم
ينفع يتحقق..
قاللي يا بابا بتسألني ليه
طب قولي إنت
أحلم بإيه..؟
وأنا أديلك شوية
رز باللبن..

شعر علي سلامة

سبيل ام عباس

بقول لها ما تيجي..
نحط سيناريو للأحداث..
قالتلي يا عم..
اللي هايسري علينا..
هايسري علي الناس..
قولتلها..
يعني لو مفيش ميه..
قالتلي..
يبقي سبيل أم عباس..
قلتلها..
ولو مفيش عيش..
قالتلي..
يبقي رز وقلقاس..
قلتلها..
ولو مفيش غاز..
قالتلي..
نسيت الوابور أبوفونيه..
وطربوش وكباس..
قلتلها..
ولو مفيش نور..
قالتلي يبقي أحسن..
عشان ماتشوفش البنات..
اللي ف الدش..
يا راجل يا بصباص..
قلتلها..
ولو مفيش بيت..
قالتلي..
نبقي نقعد عند أمي
بقي وخلاص..
قولتلها ولو فيه قلق..
قالتلي كوباية شاي..
تظبط المزاج وتعدل الراس..
قلتلها ولو فيه خوف..
قالتلي..
نقفل علينا الباب..
بالقفل والترباس..
قلتلها ولو مفيش هوا..
قالتلي..
أهوي عليك بالجورنال..
وتهوي عليا بالكراس..
قلتلها..
ولو مفيش أمل..
قالتلي..
يا خرابي..
حرام عليك..
يا ساتر يارب..
ما إحنا أهو..
عايشين..
من غير قلب..
ومن غير إحساس..
عجبك كده أهو النور قطع..

شعر علي سلامة

جرس المنبه

جرس المنبه صحاني..
قمت اتفزعت اتخضيت..
خرجت للشارع تاني..
لاقيتني لسه ف قلب البيت..
عطشت..
شربت..
شربت لكن ما ارتويت..
يمكن عشان حبيت..
حاجات ملهاش وجود..
يمكن عشان..
ضيعت عمري أغني..
للعيون السود..
ويمكن عشان..
بقي بيني وبينك حدود..
ويمكن عشان..
مش عارف بقي..
خلاص..
نسيت..


شعر علي سلامة

عاليها واطيها

آدي عاليها
وآدي واطيها
وآدي الإيد اللي بتخنقها
وتحرق فيها
وآدي دموعها
إزاي تداريها
آدي شوارعها
وآدي مدارسها
وآدي أطفالها
مين يحضنها
ومين يحرسها
ومفيش حاجة بتحلم بيها
فين عشاقها
وابتسامتها
وفين أغانيها
يارب..
كلنا عاجزين
ضايعين
ومش حاسين بيها
يارب خلقتها جميلة
وإنت وحدك اللي قادر تحميها

شعر علي سلامة

الكيلو تسعين

يكون فى علمك
أنا متواضع جداً جدا
ومش طالب كتير
لا عايز دهب
ولا عايز حرير
كفاية الستر
وشقة ف الكيلو تسعين
ما هى الحياة مشاوير
أودة وصالة
ومش مهم بقى
بتطل على جنينة
وشجر وعصافير
والحياة تبقى حلوة
مع بنت الحلال
وأحبها وتحبنى
بذمة وضمير
وحتة مدرسة صغيرة
أهو العيال تفك الخط
مش شرط لغات وحركات
وجغرافيا وتعبير
وصندوق انتخابات ألوميتال
عشان لا مؤاخذة الصراصير
ولا قدر الله
لو دخلت قسم بوليس
أطلع زى ما دخلت
محترم وكبير
وإيه كمان
إيه كمان
آه..
لو ده مش متوفر سعادتك
تبقى عضوية جمعية
حقوق الحيوان
وشكراً

شعر علي سلامة

رجل الترابيزة

ياعم قول كلام منطقى
تخبط صباع رجلك
ف رجل الترابيزة
وتبكى وتشتكى
وتحط مرهم
يفش الورم
ويروح شوية الألم
وترجع تتخبط
وتبكى تانى وتشتكى
ياعم شوف قلبك
واللا ده مش بتاعك
ياعم شوف لك حل
ياتبيع الترابيزة
ياتقطع صباعك

شعر علي سلامة

كفاح الفخفخينا

بيني وبينك ..

مفيش أحسن م المرتبة القطن ..

تعبت أوي م السفنج ..

يظهر إننا محتاجين جراحة ..

بس من غير بنج ..

يمكن الألم يداوينا ..

علي فكرة ..

إحنا تقريبا ماحدش داري بينا ..

يعني كل اللي بنعمله ..

بناخد وندي بس مع بعضينا ..

وأهو ناس تكافح بالصبر ..

وناس تكافح بالفخفخينا ..

والفخفخينا ..

هي اسم الدلع للكحول ..

إزاي نبقي عايشين ف العتمة ..

وتقولي صباح القشطة ..

صباح الفل ..

مش تفتح بقى يا اخينا..


شعر علي سلامة

جمهورية امبابة

قالت لي..

أنبوبة البوتجاز بتنفس..

قولتلها..

الحمد لله إن لسه..

فيه غاز..

ولسه قادرين نتنفس..

قالتلي النور قطع..

قولتها..

يا ستي نحسس..

قالتلي..

الرغيف اتسخط..

قولتلها..

فرصة بقي نخسس..

قالتلي..

مش هاينفع كده..

قولتلها ده كده كويس..

وطي صوتك..

يقولوا علينا عملاء..

وخونة وبنتجسس.

لصالح جمهورية إمبابة..


شعر علي سلامة

غسيل القلوب

هي القلوب بتتغسل..

زي الهدوم..

وإزاي بتغرق ف الغرام..

وإزاي تعوم..

وإزاي بتبقي طوق نجاه..

وبتبقي شط..

وإزاي بتنخل الكلام..

وإزاي بتعرف أي خط..

وإزاي بترقص م الفرح..

وإزاي بتقتلها الهموم..

وإزاي بتبكي وتبتسم..

واشمعنا يعني بتترسم..

فوق الشجر..

ساعات بتدبل ف الربيع..

وساعات بتعشق المطر..

ليه لما بتبطل غونا...

بنحس فعلا...

بالخطر...


علي سلامة

قلبي بيدق بمزاجه

أنا قلبي بيدق بمزاجه...

وكل تلات دقات...

يعدي دقة

أقوله مالك..

يقول مفيش..

يا عم مالك..

يقول مفيش..

بتحب؟!

يقوللي لأه..

عجزت؟!

يقوللي لأه...

ده أنا بس بفكرك...

إنك مش حمل زقة...

ما أنا قلبي غلس غلاسة..

أقوله الدنيا حلوة..

يقوللي بلاش سياسة...

وبيرفض الحراسة...

ويطير يحلم يغني....

ويحب غصب عني...

علني وف الخباثة...

ويرجع يدق بمزاجه...

وكل تلات دقات...

يعدي دقة...


شعر علي سلامة

ام عبد الله

بقول لها:

إحنا ليه يا أم عبدالله..

بنحللها لما نعوز..

ونحرمها لما نعوز..

ونعديها بحجة..

إن الدنيا حظوظ..

عارفة يا أم عبدالله..

أنا نفسي يا أم عبدالله..

يبقي عندي نفوذ..

وتدلعيني بقي يا أم عبدالله..

أحسن وربنا..

أنحرف وأبوظ..

نفسي يا أم عبدالله..

يبقي عندي سلطة وفلوس..

واللي أقوله يتنفذ..

يعني قيام قيام..

جلوس جلوس..

ويبقي عندي أراضي كتير..

وبقر وجاموس..

ونفسي يا أم عبدالله..

ف حتة عيل ياخد كل شيء..

بالأمر المباشر..

من غير ما يسهر ويتعب ويذاكر..

من غير كتب ومدارس..

ومدرسين ودروس..

قالتلي معلش يا خويا..

هو وجع الضروس وحش..

ربنا يشفيك..

يا راجل استغفر ربك..

إنت يا راكبك عفريت..

يا ملبوس..

ووسع كده..

خليني ادي الواد اللبوس..

بتاع الحرارة..

يا راجل..

ده أنت بتخاف من حقنة الشيح..

مع إنها زي شكة الدبوس..

منهم لله بقي..

اللي علموك شرب السجارة..


شعر علي سلامة

الحتة دي بتوجعني

بجد بجد بجد..

هو ده المناخ..

بس إنت إيه بقي..

بلاش سمك..

وبلاش أمل..

وبلاش وطن..

وبلاش فراخ..

وهاتبقي زي الفل..

شوف..

الواد ده كان دمه عسل..

ماعرفش ليه بلم كده..

ومسخ وباخ..

والواد زهقان م الكسل..

ع الحلم راح لف لما داخ..

والواد ده بقي فعلاً بطل..

بيكسب فرنسا والبرازيل

ف البلاي ستيشن

ويوقع كل الطيارات طيخ طاخ..

هو أنا ليه كل ما أقابل حد

يقوللي الحتة دي بتوجعني..

والحتة دي بتوجعني..

بقي معقول الناس..

بعد العمر ده كله ما تعرفش..

إن الطعمية بتعمل انتفاخ.

يا راجل..

شعر علي سلامة

وش مرمطة

تصدقي بقي..

إن إحنا وش مرمطة..

نيجي نرسم الفرح..

يطلع شوية شخبطة..

لايق علينا الحزن..

والقوانين..

والمسؤولين..

لايق علينا الكدب..

والكدابين..

نقوم م النوم بردانين..

مانعرفش مين

سرق من مين الغطا..

أحلام كتير..

في الهوا متشعبطة..

حقيقي..

إحنا وش مرمطة..

لايق علينا التغيير..

والتزوير..

ومجمع التحرير..

وشكل الميكروباص..

وميدان الرماية..

كأن الحكاية بالمقاس متظبطة..

ليه يا حبيبتي..

كل ما ابص في عينيكي..


شعر علي سلامة

طلع الكلام ناشف

كان نفسي أقول غنوتي..
ناعمة رومانسية..
طلع الكلام ناشف..
كاشف هموم فيا..
لا القلب نفس القلب..
ولا الحياة..
هي..

شعر علي سلامة

ااه يا ضهري..

تحس إن البلد بتصحي م النوم

بتقول آه يا ضهري..

شعرها منكوش..

وصوتها مبحوح..

كأنها كانت نايمة..

ف عشة الفراخ..

اللي فوق السطوح..

وتسند علي مين..

ده الكل مدبوح..

لا ضل راجل..

ولا ضل حيطة..

مفيش غير شوية زيطة..

تيجي شوية..

وبعدين تروح..


شعر علي سلامة

طبق اليوم-4

بقولك إيه..

بلاش تتعشم أوي ف الدنيا..

وعيشها كده..

تخاطيف تخاطيف..

جايز بكره يكون جميل..

لكن النهارده بجد مخيف..

المهم شعار البرنامج إيه..

بلاش غدا..

وبلاش عشا..

وأحسن بقي تنام خفيف..

إكتب ورايا..

لحسة زبادي من خير بلادي

وشممها ريحة المربي..

والباقي أخوية وعيش وملح ومحبة

ماعدش شيء ممكن يستخبي..

رغم الكدب والقهر والتزييف..

أي استفسار أنا ع القهوة..

أشوفكم الأسبوع الجاي..


شعر علي سلامة

ما بتحصلش كتير

لما تقوم الصبح لوحدك
فايق أوى
فرحان
والدنيا بتاخدك بالحضن
من غير لف ودوران
وإنه كمان مسموح لك تحلم
وبدون استئذان
وإن حياتك كلها تفرق
عن كام ساعة فاتوا
وإن النقط السودة ف توبك
اختفوا أو ماتوا
وإنك حد مصالح روحه
وبيحب حياته
إياك تسأل ليه وإزاى
وتدور على تفسير
وامسك فيها بعمرك كله
وإوعى تسيبها تطير
أصلها حالة جميلة جميلة
وما بتحصلش كتير

شعر علي سلامة

قراقيش..

حكومة رقيقة أوي وشيك..

بتقفل كل البيبان والشبابيك..

عشان بتخاف علينا م البرد..

لأ إحساس مرهف بجد..

الأسمنت والحديد يغلي..

تقوم تبيع الأرض..

هو ده الفكر الجديد..

اللي بيبني المجد...

وشوف الحنان والطيبة والإنسانية..

سعر تصدير الغاز..

أقل من سعر الفول والطعمية..

ده علي اعتبار إن الناس لبعضيها..

والدنيا منفاتة..

وإحنا والحمد لله..

مش محتاجين أنابيب..

والمشتري مش غريب..

جربت الشاي بالحليب

ساعة الصبحية..

قراقيش بقي وسقي يا معلم

وانسي القضية..

ده تقريباً ماحدش شايف حد


شعر علي سلامة

عيرة..

الشعر عيرة
والكحل عيرة
والورد فوق الخد
ولحد الضفيرة ..عيرة
الصبر عيرة
والضحك عيرة
والفرح والأحزان كمان
وحاجات كتيرة
حتى الحنان جوه البيوت
حتى الكلام...حتي السكوت..
حتى الهتاف جوه المسيرة
برضه عيرة
حيرني حيرة
بقينا ليه حبة حاجات؟
قمصان بدل على بالونات؟
ما بقيتش شايف إيه اللي جاي وإيه اللي فات
ما بقيتش افرق..
ده أزرق ده ولا أحمر رمادي؟
ودي كارثة ولا ده وضع عادي؟
وده طفل ولا راجل عجوز؟
وده إيه ده راخ؟ر
جايز.. يجوز
نعسان ده ولا ساكت ..وساير؟
بردان.. ده ولا ده دور وداير؟
وده إحنا ولا الكل حاير؟

http://www.youtube.com/watch?v=NUtJn7I2Sg8


شعر علي سلامة

2 التعليقات:

جميل

تابعونا على مدونة: https://3almkareem.blogspot.com/

إرسال تعليق